Чаллыда тарихта беренче тапкыр бавыр трансплантациясе үткәрелгән

Р.С.Акчурин исемендәге БСМПда узган катлаулы хирургик операцияләр өч пациентка — ике хатын-кызга һәм бер ир-атка ясалган.

Бавыр трансплантацияләре Татарстан Республикасы Сәламәтлек саклау министрлыгының штаттан тыш баш трансплантологы Александр Киршин җитәкчелегендә үткәрелгән. Аңа Акчурин исемендәге БСМПның 2 нче хирургия бүлеге табиб-хирурглары — Альбина Зубрилова, Айрат Фәтхетдинов һәм Айрат Арсланов ярдәм күрсәткән.

Табиблар билгеләп үткәнчә, бавыр күчереп утырту медицина практикасында иң катлаулы операцияләрнең берсе булып санала.

«Бу бик төгәл, ювелир дәрәҗәдәге эш, ул югары һөнәри осталык таләп итә. Казаннан килгән хезмәттәшләребезгә практик тәҗрибәләре һәм күнекмәләре белән уртаклашулары өчен зур рәхмәт. Хәзер без трансплантологиядә тагын бер мөһим юнәлешне үстерә башлыйбыз. Уңышлы стартка ныклы нигез салынды», — дип билгеләп үтә хирург Айрат Фәтхетдинов.