Декреттагы ата-аналарга – 10 баллга кадәр: яңа закон проекты

Дәүләт Думасында декрет ялындагы ата-аналар өчен пенсия балларын арттырырга тәкъдим иттеләр. Инициатива белән Леонид Слуцкий җитәкчелегендәге ЛДПР фракциясе депутатлары чыкты. Закон проекты инде РФ Хөкүмәтенә бәяләмәгә юлланган.

Нәрсә үзгәрергә мөмкин?

Әгәр тәкъдим хупланса, бала карау чоры өчен индивидуаль пенсия коэффициенты (ИПК) сизелерлек артачак:

• 6 балл — беренче бала өчен

• 8 балл — икенче бала өчен

• 10 балл — өченче һәм аннан соңгы балалар өчен

Чагыштыру өчен: хәзер бер ел бала карау өчен түбәндәге шкала гамәлдә:

• 1,8 балл — беренче бала

• 3,6 балл — икенче

• 5,4 балл — өченче һәм дүртенче

Искәртеп узыйк, бер ел эчендә җыеп була торган иң зур ИПК — 10 балл. Димәк, өченче бала өчен декрет елы максималь коэффициент белән бәяләнергә мөмкин.

Бу нәрсә аңлата?

Әгәр закон проекты кабул ителсә, декрет чоры киләчәктә пенсия күләменә тагын да зуррак йогынты ясаячак. Башкача әйткәндә, бала тәрбияләү вакыты “югалган ел” түгел, ә пенсия өчен әһәмиятле стаж буларак исәпләнәчәк.

Әлегә инициатива каралу стадиясендә. Аның язмышы Хөкүмәт бәяләмәсеннән соң билгеле булачак.