Депутат фикере: үлгән кешенең пенсия баллары гаиләсенә күчәргә тиеш

Партия лидеры Леонид Слуцкий бу хактагы мөрәҗәгатьне Россия Премьер-министры Михаил Мишустин исеменә юллаган.

Тәкъдим нигезендә, иминиятләштерелгән кеше пенсия билгеләнгәнче үлгән очракта, аның туры варисларына бер тапкыр бирелә торган компенсация түләү каралачак. Әмма бу түләү туендыручысын югалту уңаеннан пенсия билгеләнгән кешеләргә кагылмаячак.

Слуцкий искәртүенчә, бүген Россиядә пенсия эш бирүчеләр түләгән иминият взнослары хисабына формалаша. Шулай да гамәлдәге законнар буенча индивидуаль пенсия коэффициенты (ИПК) балларын мирас итеп алу мөмкин түгел. Варисларга бары тик пенсиянең тупланма өлеше генә күчә ала.

Партия лидеры моны гаделсез дип атый. Аның сүзләренчә, кеше озак еллар эшләп пенсия баллары җыя, әмма пенсиягә чыкканчы вафат булса, бу баллар тулысынча юкка чыга.

ЛДПР тәкъдиме буенча, компенсация күләме соңгы өч елдагы уртача социаль пенсиягә якын булачак һәм мәрхүмнең иминият стажына, шулай ук туплаган ИПК балларына бәйле рәвештә исәпләнәчәк.

Слуцкий фикеренчә, мондый механизм пенсия системасына түләнгән акчаларның бер өлешен гаиләгә кайтарырга, социаль гаделлекне арттырырга һәм гражданнарның пенсия системасына ышанычын ныгытырга мөмкин.

Билгеле булганча, «Яшәү өчен инфраструктура» илкүләм проекты гамәлгә ашырыла.