Депутатлар балаларны диверсиягә җәлеп иткән өчен гомерлек җәза кертергә тәкъдим итә

Дәүләт Думасының Дәүләт төзелеше һәм закон чыгару комитеты парламентның түбән палатасына диверсия эшчәнлеге өчен җинаять җаваплылыгын катгыйландыру турында закон проектын беренче укылышта хупларга киңәш итте. Бу хакта ТАСС хәбәр итә.

Дәүләт Думасы Рәисе Вячеслав Володин җитәкчелегендә Дума фракцияләре вәкилләре тарафыннан кертелгән документ Россия Җинаять кодексына үзгәрешләр кертергә тәкъдим итә.

Проект диверсияләргә ярдәм итү турындагы маддәне балигъ булмаганнарны диверсия эшчәнлегенә тарткан, вербовкалаган яки җәлеп иткән өчен җәза билгели торган норма белән тулыландыруны тәкъдим итә. Бу санкция – 500 меңнән 1 млн сумга кадәр штраф белән 10 елдан 20 елга кадәр ирегеннән мәхрүм итү, ә аерым очракларда – гомерлеккә ирегеннән мәхрүм итү.

Террорчылык эшчәнлегенә ярдәм итүгә кагылышлы маддә өчен дә шундый ук үзгәрешләр каралган: балаларны мондый җинаятьләргә җәлеп итү шулай ук 20 елга кадәр срокка яисә гомерлеккә ирегеннән мәхрүм итү белән җәзаланырга мөмкин.

Моннан тыш, проект террорчылык һәм диверсияләр белән бәйле берничә җинаять өчен җинаять җаваплылыгы яшен 14 яшькә кадәр киметүне тәкъдим итә. Документка шулай ук диверсия бергәлегендә катнашу өчен шартлы җәза билгеләнмәячәк, ә шартлы-вакытыннан алда азат итү өчен срокның кимендә 75 процентын узарга кирәк булачак дигән нигезләмә кертелгән.

Элегрәк Вячеслав Володин билгеләп үткәнчә, закон проектын карау өстенлекле, чөнки ул агымдагы чакырулар шартларында ил һәм гражданнарның иминлеген тәэмин итү белән бәйле. Комитет карары нигезендә, документ Дәүләт Думасына беренче укылышта 2025 елның 28 октябрендә чыгарылырга мөмкин.

Чыганак: Татар-информ