Эксперт Яңа елга кадәр үк сатып алырга кирәкле продуктларны атады

Бу гаилә чыгымнарын бүләргә һәм бәйрәм алдыннан бәяләр арту сәбәпле артык акча тотмаска ярдәм итәчәк. Бу хакта «Риком-Траст» инвестиция компаниясенең өлкән аналитигы Валерия Попова «Прайм» агентлыгына сөйләгән.

Эксперт сүзләренчә, беренче чиратта озак саклана торган продуктларга игътибар итәргә кирәк. Алар арасында ярма, макарон, он, шикәр, консервлар, үсемлек мае, чәй, кофе, бал, чикләвек, киптерелгән җиләк-җимеш һәм шоколад бар.

Попова шулай ук кызыл уылдыкны алдан сатып алу мөмкинлеген карарга киңәш итә. Әмма сатып алганда җитештерү датасын, яраклылык вакытын һәм саклау шартларын тикшерү мөһим.

Аналитик белдерүенчә, Яңа ел алдыннан кызыл уылдыкка бәяләр 10–15 процентка, ә мандарин һәм башка цитрус җимешләренә 10–20 процентка артырга мөмкин. Алкогольле эчемлекләр һәм кайбер башка товарлар да кыйммәтләнергә мөмкин.

Яңа ит, суытылган балык, диңгез продуктлары, сөт ризыклары һәм тиз бозыла торган башка продуктларны бәйрәмгә якынрак сатып алу яхшырак. Ә бәрәңге, кишер, суган, чөгендер, кабак һәм кәбестә кебек яшелчәләрне тиешле шартларда алдан алып сакларга мөмкин.

Эксперт акцияләр вакытында бәяләрне чагыштырырга киңәш итә: ташлама һәрвакытта да отышлы булмаска мөмкин.