Эш урыныгызда 29 градус эссеме? Эш бирүче эш көнен кыскарта ала

Юрист Александр Хаминский аңлатканча, эш бүлмәсендәге температура 28,5 градустан югары күтәрелгән очракта эш көнен кыскарту тәкъдим ителә.

Аның сүзләренчә, Роспотребнадзор тәкъдимнәре буенча:

• бүлмәдә температура 28,5 градуска җитсә — эш көнен 1 сәгатькә кыскарту;

• 29 градус булса — 2 сәгатькә кыскарту киңәш ителә.

Ә инде температура 32,5 градустан югары булган очракта, урамда өзлексез эшләү 20 минуттан артмаска тиеш. Аннан соң хезмәткәр кимендә 12 минут салкынча урында ял итәргә тиеш.

Юрист сүзләренчә, законда эш көнен мәҗбүри кыскарту турында турыдан-туры норма юк. Әмма эш бирүче хезмәткәрләр өчен куркынычсыз хезмәт шартлары булдыру өчен җаваплы.

— Эш бирүче үз инициативасы белән вакытлыча эш көнен кыскарту турында боерык чыгара ала. Бу вакыт хезмәткәр гаебе белән түгел, шуңа күрә ул түләнергә тиеш, — дип аңлатты Александр Хаминский.

Шулай ук кайбер оешмалар эссе көннәрдә хезмәткәрләрне дистанцион эшкә күчерү мөмкинлеген дә карый.

Белгечләр эссе вакытта күбрәк су эчәргә, кондиционерсыз бүлмәләрне еш җилләтергә һәм мөмкин кадәр физик йөкләнешне киметергә киңәш итә.

Синоптиклар фаразлавынча, быелгы май аеруча эссе булырга мөмкин. Мәскәүдә инде һава температурасы +30 градустан артып, күпьеллык рекордлар яңарган.