Эсседә песи белән этне ничек сакларга? Ветеринарлар кисәтә

Ветеринарлар кисәтә: аеруча кыска муенлы этләр һәм мәчеләр – бульдоглар, мопслар, фарсы мәчеләре, шулай ук өлкән яшьтәге хайваннар кызу һаваны авыр кичерә.

Белгечләр әйтүенчә, кара төстәге йонлы этләр дә эссене начаррак күтәрә. Шуңа күрә мондый хайваннарга аерым игътибар кирәк.

Эсседә хайваннарны ничек сакларга?

Ветеринарлар хайваннарны иртәнге һәм кичке салкын вакытта йөртергә киңәш итә. Көндез урамга чыгарга туры килсә, күләгәдә йөрү, кызган асфальттан качу һәм үзең белән су алу мәҗбүри.

Эссе көннәрдә актив уеннардан һәм озак йөгерүдән баш тарту хәерле. Хайванның тәпиләрен, култык асларын һәм танавын юеш тукыма белән сөртү дә артык җылынуны киметергә ярдәм итә.

Өйдә берничә урында су куярга һәм аны еш алыштырырга киңәш ителә. Әмма хайваннарга бозлы су бирергә ярамый.

Машинада калдырырга ярамый!

Белгечләр иң куркыныч хаталарның берсе турында да искәртә: хайванны хәтта берничә минутка да автомобильдә калдырырга ярамый. Ябык машина эчендә температура бик тиз күтәрелә һәм бу җылылык сугуга китерергә мөмкин.

Шәһәр читенә чыкканда да йорт хайваннарын кояш астында караусыз калдырырга киңәш ителми. Иң эссе сәгатьләрдә алар кондиционерлы яки салкынча бүлмәдә булырга тиеш.

Эссе сугу билгеләре

Хайванда түбәндәге симптомнар күзәтелсә, кичекмәстән чара күрергә кирәк:

• сүлпәнлек;

• еш һәм авыз ачып сулау;

• көчле селәгәй агу;

• косу;

• аң югалту;

• күз карасының киңәюе;

• тән температурасы күтәрелү.

Мондый очракта хайванны салкын урынга күчерергә, тәпиләрен һәм тәнен дымлы тукыма белән сөртергә кирәк. Әгәр хәл бер сәгать эчендә яхшырмаса, ашыгыч рәвештә ветеринария клиникасына мөрәҗәгать итәргә кирәк.

Ветеринарлар искәртә: эсседә йорт хайваннары да кешеләр кебек үк ярдәмгә һәм игътибарга мохтаҗ.