Фаҗигале юл һәлакәте турында: «Син исәнме?», дип кычкырган ул

Авария 3 февральдә 17 сәгать 50 минутта Муса Җәлил проспектында, 72 нче йорт каршында килеп чыккан. «Шкода» автомобилен йөртүче 44 яшьлек ир-егет тизлекне арттырган һәм «Черри» автомобиленә килеп бәрелгән. Шуннан соң машина бордюр ташына килеп кергән һәм янәдән багана белән "сөзешкән". Юл-транспорт һәлакәте аркасында «Шкода» йөртүчесе урында ук үлгән.

«Мин вакыйга урынында булдым, авариядә катнашучылар, шаһитлар белән сөйләштем, соңрак видеорегистраторны карадым. Шаһитлар раславынча, «Шкода» йөртүчесе шактый зур тизлек белән хәрәкәт иткән, башка автомобильләр белән узышлы уйнаган, күрше рәткә керергә тырышкан. «Черри»не йөртүче хатын-кыз урта полоса буйлап сайланган тизлек белән барган, шул вакытта кырый полосадан «Шкода»атылып чыккан. Кискен маневр, шулай ук юл шартларына җавап бирми торган тизлек кеше үлеменә китергән», - дигән Кадиков.

Аның сүзләренчә, «Черри» руле артындагы хатын-кыз шок хәлендә булган. Ул машинасының арткы утыргычында утырган, куркынычсызлык каешын эләктергән балага мөрәҗәгать итеп : "Син исәнме? Син исәнме?"дип кат-кат кабатлаган, улы өчен борчылган. 

«Хатынның баласы белән «Дельфин» бассейныннан кайтып барышы булган. Бу хәл турында ишеткәч, аның туганнары да килделәр. Алар да шок хәлендә иде. Аларның исән калуы бу могҗиза. «Шкода» йөртүчесеннән башка беркем дә зыян күрмәгән. Әгәр дә ул «Черри»ны да эләктереп алган булса, аның да баганага килеп бәрелүе бар. «Шкода»ның пассажиры – машина йөртүченең дусты да һәлак булырга мөмкин иде», – дип билгеләп үтте Радий Зәкиевич.

Юл һәлакәте сәбәпчесенә нибары 44 яшь булган. Авариядә исән калган дусты әйтүенчә, аларның кунакка барулары булган. Һәлак булучыны юл кагыйдәләрен төгәл үтәүче, намуслы кеше буларак тасвирлый. Кем әйтмешли, аңа яшәргә дә, яшәргә дә иде әле! «Авариядә һәлак булган ир-егетнең әнисе белән әтисе дә фаҗига урынына килгәннәр, елыйлар... ә асылда, кеше үзен үтергән!», дип йомгаклаган үз сүзен Чаллы ЮХИДИ башлыгы Радий Кадиков.