«ФСБ операциясе» дип алдап, Татарстанда яшәүче пенсионерны миллионнарсыз калдырганнар

Җинаятьчеләр үзләрен дәүләт органнары вәкилләре итеп таныштырып, пенсионерның оныгын һәм башка яшьләрне дә алдау схемасына җәлеп иткән.

Татарстан Эчке эшләр министрлыгы мәгълүматлары буенча, башта аферистлар пенсионерның оныгы белән элемтәгә кергән. Алар кызга диспансеризация узу өчен кирәк дип, СМС аша килгән кодны әйтергә кушкан. Шундый ук юл белән Королев һәм Сызрань шәһәрләрендә яшәүче 18 һәм 20 яшьлек егетләрне дә алдаганнар.

Соңрак яшьләргә үзләрен дәүләт структуралары вәкилләре дип таныштырган кешеләр шалтыратып, аларның дәүләт хезмәтләре порталындагы аккаунтлары җимерелүе һәм банк счетларыннан шикле операцияләр башкарылуы турында хәбәр иткәннәр. Куркыту һәм психологик басым ярдәмендә аларны мошенниклар күрсәтмәләрен үтәргә мәҗбүр иткәннәр.

Җинаятьчеләр яшьләрне Әлмәткә чакырып, аларны янәсе «Федераль куркынычсызлык хезмәтенең штаттан тыш хезмәткәрләре» буларак махсус операциядә катнашырга күндергәннәр. Пенсионерның беркатлы оныгы аларны бабасы йортына кертеп җибәргән һәм сейфларның кайда урнашуын күрсәткән.

Мошенниклар видеоэлемтә аша яшьләрнең һәр адымын күзәтеп торган. Йорттагы кыйммәтле сәгатьләр, коллекцион тәңкәләр, орден-медальләр һәм башка кыйммәтле әйберләр җыеп алынган. Алдан исәпләүләр буенча, зыян күләме 70 миллион сумга җитә.

Шул ук вакытта аферистлар пенсионерның оныгыннан тагын бер миллион сум акча күчертергә дә маташкан. Әмма банкоматта акча булмау һәм кызның әти-әнисе белән сөйләшүе җинаять схемасын вакытында туктатырга ярдәм иткән.

Вакыйгага күршеләр игътибар иткән. Алар чакырган полиция хезмәткәрләре килеп җиткәч кенә яшьләр үзләренең мошенниклар кулында коралга әверелгәннәрен аңлаган.

Әлеге факт буенча РФ Җинаять кодексының мошенниклык турында маддәсе нигезендә җинаять эше кузгатылган. Шикләнелүчеләргә карата килү турында йөкләмә рәвешендә чик кую чарасы сайланган. Тикшерү дәвам итә.

Хокук саклау органнары гражданнарны таныш булмаган кешеләргә СМС-кодларны хәбәр итмәскә һәм дәүләт органнары вәкилләре исеменнән килгән шалтыратуларга тәнкыйть күзлегеннән карарга чакыра.