Галимнәр “Супер акыл” ясауны туктатып торырга чакыра

Бу хакта алар ачык хат чыгарган, дип хәбәр ителә ТР Фәннәр академиясенең Гамәли семиотика институты Телеграм-каналында. 
Хатны имзалаучылар арасында ясалма интеллект “аталары” саналган Джеффри Хинтон Йошуа Бенжио, шулай ук Apple ширкәтенә нигез салган Стив Возняк кебек танылган шәхесләр, галимнәр, сәясәтчеләр бар.

Хат авторлары язуынча, ясалма интеллект сәламәтлек саклау һәм муллыкка ирешүдә моңарчы күрелмәгән мөмкинлекләр ача. Шул ук вакытта, адәми затны барлык когнитив өлкәләрдә узып китәрдәй супер акыл булдыру омтылышы җитди борчылу тудыра, ди алар.
Галимнәр фикеренчә, мондый системаларны ясар алдыннан, башта аларны контрольдә тотып була дигән фәнни консенсус булырга тиеш. Икенчедән, аларны киң җәмәгатьчелек хупларга тиеш. Шушы ике шарт үтәлми торып, супер акыл ясауны әлегә тыярга кирәк, ди алар.

Супер акыл нинди куркыныч тудыра соң? Аларны куллану эш урыннары кимүгә китерәчәк, нәтиҗәдә, кешеләргә ихтыяҗ калмаячак, диелә. Бу исә ирек, гражданлык хокуклары, абруй һәм контроль дигән әйберләрнең юкка чыгуына китерә ала. Авторлар хәтта кешелекнең юкка чыгу ихтималы турында кисәтә.

Мәгълүм булганча, Супер акыл ясау хыялы белән мавыккан ширкәтләрнең берсе – OpenAI. 2022 елда ул ChatGPT программасын булдырган. Ширкәт башлыгы Сэм Альтман супер акыл 2030 елга барлыкка киләчәк дип фаразлый. Ул вакытка икътисадта эшләрнең 40 проценты ясалма интеллект ярдәмендә башкарылачак, ди ул.