Гуманитар вузларга керүчеләр тарихтан БДИ тапшырырга тиеш булачак

2027 елда Россиянең гуманитар югары уку йортларына кергәндә тарих бердәм дәүләт имтиханында төп предмет булачак. Бу хакта Рособрнадзор башлыгы Анзор Музаев хәбәр итте. 

Музаев ассызыклаганча, 2026 ел – күчеш елы. Җәмгыять белеме урынына тарих тапшырырга теләүчеләргә киртәләр юк. “Ә 2027 елда инде гуманитар юнәлешләргә кергәндә тарих өстенлекле предмет булачак. Һәм көзен 10нчы сыйныфка килгән укучылар бу хакта беләләр”, - ди ведомство башлыгы. 

Элегрәк мондый инициатива белән тарих буенча яңа дәреслек авторлары белән очрашуда МГИМО ректоры Анатолий Торкунов чыгыш ясаган иде. Ул билгеләп үткәнчә, гуманитар югары уку йортларына керүчеләрнең шактый өлеше җәмгыять белеме буенча БДИ тапшыра. Торкунов фикеренчә, тарих курсында болай да җәмгыять белеме төшенчәләре бар. РФ Президенты Владимир Путин бу идеяне хуплады.