Һәлак булган хәрбинең кызы мошенникларга 7 миллион сум биргән

Әлеге акчаларны ул махсус хәрби операциядә һәлак булган әтисеннән соң дәүләттән алган.

ТР буенча Эчке эшләр министрлыгының икътисади куркынычсызлык һәм коррупциягә каршы тору идарәсенең аеруча мөһим эшләр буенча оперуполномоченные Рәдис Йосыпов хәбәр иткәнчә, хатын-кыз 6 миллион сумны мошенниклар җибәргән курьерга тапшырган, тагын 1 миллион сумны банкомат аша күчергән. Әлеге хәл узган елның декабрендә булган.

Хокук сакчылары аңлатуынча, мошенниклар махсус хәрби операциядә катнашучыларның туганнарын төп корал итеп ала. Алар социаль челтәрләрдәге тематик төркемнәр аша элемтәгә керә, фишинг-сайтларга сылтамалар җибәрә яки турыдан-туры шалтыратып алдау схемаларын куллана.

Күп очракта башта кечкенә сумма алалар, аннары янәсе “тикшерүчеләр” шалтыратып, акчаларның тыелган оешмалар счетына күчүе турында хәбәр итә. Куркытулар һәм психологик басым нәтиҗәсендә кешеләр “җинаятьтә катнашмавын исбатлау” өчен зур суммалар күчерергә мәҗбүр була.

Эчке эшләр министрлыгы гражданнарны сак булырга чакыра: билгесез кешеләргә акча тапшырмагыз, шикле сылтамалар буенча күчмәгез һәм мондый очракларда кичекмәстән полициягә мөрәҗәгать итегез.