Һиндстанда дәвалап булмый торган Нипах вирусының учагын теркәгәннәр

The Economic Times хәбәр иткәнчә, йоктыручылар арасында – табиб, шәфкать туташы һәм хастаханәнең тагын бер хезмәткәре. Шәхси клиникада эшләгән ике шәфкать туташы гыйнвар башында авырый башлаган. Аларда югары температура күзәтелә һәм сулыш алуда проблемалар барлыкка килгән. Бер хатын-кыз хәтта комага эләккән. Карантинда 100 гә якын кеше исәпләнә.

Искәртеп узарга кирәк, Нипах вирусы беренче тапкыр 1999 елда Малайзиядә ачыкланган. Шул вакыттан бирле авыруның тагын 12 очрагы теркәлгән, барысы да — Көньяк Азиядә. Соңгысы Һиндстанда 2024 елның июлендә теркәлгән. Ул вакытта вирустан бер яшүсмер һәлак була.

Роспотребнадзор матбугат хезмәтендә Россиядә Нипах китереп чыгарган авыру очраклары теркәлмәгән, дип белдергәннәр. Әмма ведомствода шулай ук Һиндстанга һәм Көньяк-Көнчыгыш Азия (Вьетанам, Таиланд, Сингапур һб) илләренә баручы туристларга киңәшләр бирделәр. Әйтик, авыру хайваннар (беренче чиратта ярканатлар һәм дуңгызлар) белән теләсә нинди элемтәдән сакланырга кирәк. Шулай ук җәмәгать урыннарында булганнан соң һәм ашар алдыннан кулларны сабын белән яхшылап юарга, һичшиксез спиртлы антисептик кулланырга һәм тикшерелмәгән чыганаклардан су эчмәскә кирәк.