Яңа ел төнендә - эштә: кемнәргә бәйрәм эләкми?

31 декабрьдән 1 гыйнварга каршы төндә Казан халкының 7%ы эштә булачак. Мондый мәгълүматны икътисади яктан актив шәһәр халкы арасында үткәрелгән сораштыру нәтиҗәләре буенча SuperJob сервисы китерә.

Бәйрәм төнендәге эш сменасы ешрак ир-атларга туры килә: сораштыруда катнашкан ир-атларның 10%ы, ә хатын-кызларның 4%ы Яңа ел төнендә эшләячәген әйткән. Бу вакытта эш урынында еш кына табиблар һәм кече медицина хезмәткәрләре, авария-коткару хезмәтләре, шоферлар, полиция хезмәткәрләре, сакчылар, инженерлар, шулай ук туктаусыз эшләүче җитештерү тармаклары хезмәткәрләре була.

Шул ук вакытта казанлыларның күпчелеге 2026 елны өйдә каршыларга җыена — сораштырылучыларның 71%ы шулай дип җавап биргән. Тагын 6%ы бәйрәмне кунакта үткәрергә ниятли. 5% башка шәһәргә барырга планлаштыра, 4% Яңа елны шәһәр читендә каршы алачак. Ә рестораннарда, ял йортларында яки чит илләрдә бәйрәм итәргә 2% кеше җыена.