Җиде айда 4 меңгә якын хокук бозу: Татарстанда юл кагыйдәләрен иң еш бозучы компанияләр аталды

Агымдагы елның җиде аенда антирейтингтагы ун компаниягә караган транспорт чаралары 4 меңгә якын хокук бозу очрагы теркәгән.

Абсолют антилидер булып Казандагы «РТХ лабораториясе» танылды. Компаниягә караган автомобильләр белән 528 хокук бозу очрагы теркәлгән. Икенче урында — Алабуганың «АВП Групп» компаниясе (459), өченче урында — Чаллыдагы «Райз» (415).

Беренче бишлеккә шулай ук Әлмәтнең «Нефтестройэнерго» компаниясе (411) һәм Казанның «ПСО „Казан“» (406) кергән.

Антирейтингның калган урыннарын Идел буе ТКС ИТЦ (401), Чаллының «Машина детальләре» (384), шулай ук Казандагы «Профснаб ПК», «СТР» һәм «Амаль транс» компанияләре биләгән. Соңгыларының һәркайсында 300дән артык юл йөрү кагыйдәсен бозу очрагы ачыкланган.

Дәүләт автоинспекциясе мәгълүматларына караганда, ел башыннан Татарстанда 1663 юл-транспорт һәлакәте булган. Алар нәтиҗәсендә 183 кеше һәлак булган, тагын 2021 кеше төрле дәрәҗәдә җәрәхәтләр алган.

Юл хәрәкәте иминлеге комиссиясе предприятие җитәкчеләрен хезмәткәрләрнең юл йөрү кагыйдәләрен үтәвен катгыйрак контрольдә тотарга һәм даими рәвештә инструктажлар үткәрергә чакырды.