«Илһам» сериалында Илһам Шакиров ролен кем башкарачагы билгеле булды

Биредә артист контрактка кул куйды һәм легендар җырчының киемнәрен киеп карады.

«Ватан-21 гасыр» кинокомпаниясенең «Илһам» сериалында төп рольне Чаллы дәүләт татар драма театры актеры Марсель Мөсәвиров башкарачак. 

Артист Илһам Шакировның киемнәрен киеп караган. Пальто белән пиджак хәзер дә модадан чыкмаган, Марсельгә туры килә, әйтерсең лә нәкъ менә аның өчен тегелгән.

Сериал Илһам Шакировның тууына 90 ел тулуга багышлана һәм артистның аякка басу чорын, аның халыкара гастрольләрен, беренче язмаларын һәм иҗади эзләнүләрен тасвирлый.

Өч серияле фильм «Ватан 21 гасыр» кинокомпаниясе тарафыннан Марат Әхмәтов җитәкчелегендәге татар телен һәм Татарстан халыклары вәкилләренең туган телләрен саклау һәм үстерү мәсьәләләре буенча ТР Рәисе каршындагы комиссия һәм ТНВ каналы ярдәмендә төшерелә.