Хатын-кызларга караганда, ир-атлар күпмегә кимрәк яши?

Табиблар билгеләп үткәнчә, күп очракта нәкъ менә вакытында медицина тикшерүе узмау җитди авыруларның соң ачыклануына китерә. Статистика күрсәткәнчә, ир-атлар хатын-кызларга караганда уртача 10 елга кимрәк яши.

Моның сәбәпләре арасында стресс, аз хәрәкәтле яшәү рәвеше, дөрес тукланмау, тәмәке тарту һәм алкоголь куллану кебек факторлар бар. Болар барысы да йөрәк-кан тамырлары авырулары, диабет һәм башка йогышсыз чирләр куркынычын арттыра. Белгечләр ассызыклаганча, сәламәтлекне саклауның иң нәтиҗәле юлы – диспансеризация һәм профилактик тикшерүләрне вакытында узу.

Күп кенә авырулар башлангыч чорда үзен сиздерми, шуңа күрә симптомнар барлыкка килүен көтү дөрес түгел. Иртә ачыкланган чирне дәвалау күпкә нәтиҗәлерәк һәм җиңелрәк уза. «Озын һәм актив тормыш» илкүләм проекты кысаларында илебездә даими диспансеризация системасы үстерелә. Бу гражданнарга сәламәтлекләрен контрольдә тоту мөмкинлеге бирә.

Сәламәтлек саклау министрлыгы мәгълүматларына караганда, профилактик тикшерү узган кешеләрнең якынча 70 процентында кимендә бер йогышсыз чир үсеше өчен куркыныч факторы ачыклана. Әлеге сан диспансеризациянең әһәмиятен ачык күрсәтә. Табиблар ир-атларга берничә гади, әмма нәтиҗәле кагыйдәне үтәргә киңәш итә: даими рәвештә медицина тикшерүе узу, тәмәке тартудан баш тарту, алкоголь куллануны чикләү, баланслы туклану һәм көн саен кимендә 30 минут физик активлык белән шөгыльләнү.