Югалган хәрбиләрне «эзләү» буенча ялган сайтлар барлыкка килгән

Бу хакта Татарстан цифрлар министрлыгы хәбәр итә.

Ведомствода ассызыклаганча, мошенникларның максаты – «ярдәм итү түгел, ә акча урлау һәм зарарлы программаларны тарату аша шәхси мәгълүматлар җыю».

Ялган төркемнәр һәм чатлар булдыручылар хәбәрсез югалганнарның туганнары белән элемтәгә керергә тырыша, хәрбинең якыннарыннан шәхси мәгълүматны алу яки «ярдәм» исеме астында акча җыю максаты белән эш итә.

Татарстан цифрлар министрлыгында мондый төркемнәргә кермәскә, шикле сылтамалар буенча күчмәскә һәм билгесез затларга шәхси мәгълүмат җибәрмәскә чакыралар. «Барлык рәсми мәсьәләләр дәүләт инстанцияләре аша хәл ителә!»- дип өстәделәр министрлыкта.