Кайсы техникумнар «кара исемлек»кә кергән?

Таякның юан башы студентларны кабул итү буенча максатчан күрсәткечләрне үтәмәгәне өчен республиканың дистәдән артык училище-көллиятенә төште. 

Быел Татарстан мәгариф һәм фән министры Илсур Һадиуллин уңай динамиканы билгеләп үтте.

-    Узган ел тәнкыйтьләнгән урта һөнәри уку йортларының дүртесе план күрсәткечләрен тулысынча үтәде, ә икесе максатчан күрсәткечләргә якынлашты. Шуның белән бергә, алты оешма икенче ел рәттән түбән нәтиҗәләр күрсәтә. Шуларның өчесендә - Минзәлә педагогика көллиятендә, Бөгелмә һөнәри-педагогика көллиятендә һәм Тәтеш авыл хуҗалыгы техникумында яңа директорлар билгеләнде. Алар алдына әлеге оешмаларны тәнкыйть зонасыннан чыгару бурычы куелган. Калган өч көллият җитәкчелегенә дә хәлне төзәтү буенча чаралар күрергә кирәк, - дип бурыч куйды Илсур Һадиуллин.

Кабул итүдә иң түбән күрсәткеч Тәтеш авыл хуҗалыгы техникумында теркәлгән, анда максатчан күрсәткеч 64,5%ка гына үтәлгән иде. Аннан соң 75,7% план үтәлешен күрсәткән Чүпрәле тармак технологияләре техникумы килә, Арча агросәнәгать техникумының Балтач филиалында  да күрсәткечләр борчу уята. “Кара” исемлектә шулай ук Чирмешән, Минзәлә, Бөгелмә районнары уку йортлары да исәпләнә.