Казан циркы «язгы сәяхәт»кә чакыра

«Маршрут построен» дип аталган яңа шоу 21 февральдә старт ала һәм 19 апрельгә кадәр дәвам итәчәк. Форматы – «язгы вояж»: артистлар белән бергә вакыт һәм киңлекләр аша эмоциональ цирк сәяхәте. Төп декорацияне 18 метр биеклеккә күтәрелгән йөзләгән фонтан тәшкил итәчәк – бу тамашачыларны чын диңгез мохитенә чумдырырга мөмкинлек бирә. Куючы режиссёр – РФның атказанган артисты Андрей Шарнин.

Программа цирк жанрлары төрлелеге белән аерылып тора: акробатика, һава гимнастикасы, жонглёрлык, эквилибр. Аеруча игътибарга лаек номер – цирк дөньясы легендасы, классик эквилибр остасы, Монте-Карлодагы Халыкара цирк фестиваленең «Көмеш клоун» һәм Веронадагы Халыкара цирк фестиваленең «Алтын йолдыз» бүләкләре иясе Олег Изосимов чыгышы.

Казахстаннан Адлет Тиканов җитәкчелегендәге «Hassak» төркеме дә үзләренең кабатланмас номерын тәкъдим итәчәк. Аларның маңгайда берьюлы якынча 180 кг авырлыктагы өч кешене күтәрү трюгы Алматыдагы III Халыкара цирк фестивалендә гран-при һәм «Чикләрсез» Халыкара цирк фестивалендә алтын бүләккә лаек булган.

Ике еллык гастрольләрдән соң манежга яңадан «Группа захвата» клоуннар дуэты – Әнвәр Саттаров һәм Николай Коновалов кайта. Алар Ижауда узган XIV Халыкара цирк сәнгате фестивалендә бронза һәм «Артист» II Халыкара цирк сәнгате фестивалендә призёр булган артистлар.

Тамашачылар шулай ук балалар цирк мәктәбе укучыларының яңартылган номерын күрә алачак. Гадәттәгечә, бөтен тамашаны Казан циркының дәртле балеты бизәячәк. Хореограф-куючы – Денис Лузин.