Казан үзәгендә «Тарих фест» узачак

Кунакларны лекцияләр, экскурсияләр, театр перформанслары, тарихи реконструкцияләр һәм урта гасыр тарихына багышланган очрашулар көтә. Чараларның күбесе бушлай, әмма түләүле форматтагылары да каралган.

Татарстан Милли музее директоры Айрат Фәйзрахманов әйтүенчә, фестивальнең төп максаты – Татарстан һәм Идел буе халыкларының урта гасыр тарихын киң җәмәгатьчелеккә кызыклы форматта тәкъдим итү.

– Фестивальнең төп идеясе – урта гасыр тарихына, тамырларыбызга игътибарны юнәлтү. Без татар халкының, Идел буе халыкларының урта гасыр тарихы турында сөйләшәчәкбез. Бу чор тарихын төрле яклап ачарга тырышачакбыз, – диде ул.

Фестивальнең мәртәбәле кунаклары арасында Мәскәүдән танылган журналист һәм блогер Павел Пряников та булачак. Ул урта гасыр тарихын заманча күзлектән аңлатуы белән билгеле.

Программада экскурсияләргә дә зур урын бирелгән. Айрат Фәйзрахманов үзе Казан Гостиный дворының гадәттә ябулы булган җир асты өлешләре буенча экскурсия үткәрәчәк. Катнашучылар музей биналарының яшерен почмакларын күрә һәм аларның тарихы белән таныша алачак.

Фестиваль кысаларында тарихчылар Искәндәр Измайлов, Марат Гатин, Ленар Абзалов, Дамир Исхаков катнашында татар телендә опен толк форматындагы очрашулар узачак. Алар Алтын Урда, Бөек Ефәк юлы һәм татар тарихының башка әһәмиятле темалары турында сөйләячәк.

Музей белгечләре «Үлем археологиясе» дип аталган махсус музей күрсәтүен дә әзерләгән. Анда борынгы һәм урта гасыр кешеләренең җирләү йолалары, шул чордан сакланган археологик табылдыклар турында сүз барачак.

Фестиваль программасында «Ага-базар» театральләштерелгән тамашасы, “Мең еллык сабырлык” театраль перформансы, Булат Шәйминең аккустик концерты, Геннадий Макаровның “Уен коралларында гасырлар авазы” лекция-концерты, тарихи дефиле да  бар.

Оештыручылар фикеренчә, фестиваль Казан халкы һәм шәһәр кунаклары өчен тарихны фәнни генә түгел, ә кызыклы, интерактив форматта танып белү мөмкинлеге бирәчәк.