Казан халкына бер бүлмәле фатир алырга акчаны ничә ел җыярга кирәк?

Уртача хезмәт хакын һәм торак бәясен исәпкә алып, мегаполисларда яшәүчеләргә яңа төзелгән йорттагы бер бүлмәле фатирга акчаны 6,8 ел, ике бүлмәлегә — 10,4 ел, «өчле»гә 13,9 ел җыярга туры килә, дип яза «Российская газета». Уртача хезмәт хаклары һәм күчемсез милек бәяләре арасындагы иң отышлы нисбәт Красноярскида теркәлгән: яңа йорттан фатир алу өчен 6 еллык хезмәт хакы кирәк булачак.

Казанда бер бүлмәле фатирга акча 10,7 ел җыярга кирәк

Уртача хезмәт хаклары һәм күчемсез милек бәяләре арасындагы иң зур аерма Казанда күзәтелә, монда торакка акча туплау Красноярскига караганда ике тапкыр озаграк — уртача 14,6 ел вакыт таләп итә. Санкт-Петербургта аз гына яхшырак — 14,3 ел һәм Мәскәүдә — 13,7 ел.

Санаган вакытта белгечләр Росстатның агымдагы ел язындагы хезмәт хаклары турындагы мәгълүматларыннан (Россия буенча уртача 109 мең сум тәшкил иткән, бу узган ел белән чагыштырганда 11 процентка күбрәк) һәм күчемсез милек базарын анализлау платформасы мәгълүматлары буенча яңа торакның уртача бәясеннән чыгып эш иткәннәр.

Бер бүлмәле фатирга, бу исәпләүләр буенча, Казанда яшәүчеләргә акчаны 10,7 ел җыярга туры киләчәк. Бу башка шәһәрләрдәге уртача ике бүлмәле фатирга караганда да күбрәк. Иң тиз арада үз көче белән «бер бүлмәлегә» акчаны Красноярск халкы җыя ала — 4,2 ел. Себер шәһәрендә хезмәт хаклары Казандагыга караганда бераз югарырак, ә фатирлар ике тапкыр диярлек арзанрак.