Казанда мохтаҗ булган Бөек Ватан сугышы ветераннарын торак белән тәэмин иттеләр

Бу хакта шәһәрнең торак сәясәте идарәсе җитәкчесе вазифаларын башкаручы Руслан Гыйльфанов эшлекле дүшәмбедә белдерде.

«Горурланып хәбәр итәм, торак шартларын яхшыртуга мохтаҗ дип танылган барлык ветераннар һәм аларның гаилә әгъзалары торак белән тәэмин ителде», – диде Гыйльфанов.

2025 елның беренче кварталында бу максатларга 5 млн сумнан артык акча юнәлдерелгән. Бүлеп бирелә торган бюджет акчаларының коммерция базарында торак сатып алу өчен җитәрлек булмавын исәпкә алып, Казанда ветераннарга социаль ипотека программасы буенча төзелгән йортларда бер бүлмәле фатирлар бирелә.

Гыйльфанов шулай ук билгеләп үткәнчә, ветераннарны торак белән тәэмин итүне җайга сала торган федераль законнарга үзгәрешләр кертелгәннән бирле, 1,6 меңнән артык кеше үзләренең торак шартларын яхшырта алган. Бу максатларга федераль бюджеттан 1,6 млрд сум бүлеп бирелгән. Бу эшне Татарстан җитәкчелегенең актив ярдәме белән һәм субсидияләр хисабына – фатир алучылар ягыннан өстәмә түләүләрне җәлеп итмичә гамәлгә ашыру мөмкин булган.

Исегезгә төшерәбез, Татарстан Рәисе Рөстәм Миңнеханов Бөек Җиңүне бәйрәм иткән көннәрдә Татарстанда яшәүче һәр ветеранга, тыл хезмәтчәннәренә ярдәм чаралары күрелергә тиешлекне ассызыклаган иде.

Чыганак: Татар-информ