Казанда «РОК-ВОЛНА» фестиваленә гаризалар ачылды: татарча рок башкаручыларны да көтәләр

Зур рок-чара 27 июньдә «Крылья Советов» паркында үтәчәк.

Оештыручылар хәбәр иткәнчә, гаризалар 15 июньгә кадәр кабул ителә. Фестивальдә яшь чикләве булмаган ялгыз артистлар һәм музыкаль коллективлар катнаша ала. Алар автор җырларын да, рок-композицияләрнең кавер-версияләрен дә башкара алачак. Татар телендәге чыгышлар да аерым хуплана.

Фестиваль Татарстан Яшьләр эшләре министрлыгы ярдәмендә уза. Проект шулай ук Росмолодежь грантларының ике тапкыр җиңүчесе булып тора.

Быелгы фестивальнең хедлайнерлары арасында «Прогульщики» төркеме, «JUST BRASS» тынлы оркестры һәм Казанның «LEVEL UP» рок-төркеме бар.

Җиңүчеләр биш номинация буенча билгеләнәчәк:

• «Иң яхшы инструменталь рок-башкару»

• «Иң яхшы автор рок-җыры»

• «Иң яхшы кавер-башкару»

• «Татар телендә иң яхшы рок-башкару»

• «Тамашачы симпатиясе призы»

Соңгы елларда фестиваль зур кызыксыну уята: 2022–2025 елларда аны 21 меңнән артык кеше офлайн караган, ә онлайн-трансляцияләрне 26 меңнән күбрәк тамашачы күзәткән.

Оештыручылар фикеренчә, «РОК-ВОЛНА» яшь музыкантлар өчен үз иҗатын киң аудиториягә тәкъдим итү мөмкинлеге булып тора.