Казанда россиялеләрне 121 миллион сумга алдаган мошенникны хөкем итәчәкләр

Россиянең Генераль прокуратурасы хәбәр иткәнчә, ул биржада сәүдә оештыруга укытучы буларак  россиялеләрдән акча урлаган.

Гаепләнүче җинаятьтәшләре белән бергә 2017 елның февраленнән 2021 елның октябренә кадәр законсыз брокерлык эшчәнлеген гамәлгә ашырган. Казан, Екатеринбург һәм Чебоксар халкы "Форекс" электрон базарында һәм криптобиржаларда акча эшли алачакларына ышанып, аларга акча ышанып тапшырган. Биш ел эчендә ялган брокерлар 102 зыян күрүчедән 121 млн сум акча урлаган.

Миронов үзенә карата җинаять эше ачылуын белгәч, хокук саклау органнарыннан кача һәм халыкара эзләүгә игълан ителә. Аны Индонезиядә тапканнар, аннан 2023 елның сентябрендә Россиягә кайтарганнар.

ТР Прокуратурасы җинаятьчел бергәлек оештыру һәм мошенниклык турындагы җинаять эше буенча гаепләү бәяләмәсен раслады. Миронов эшен Казанның Вахитов район судында караячак. Гаепләнүченең фатирына арест салынган.