Казанда «СМИшная урамы» ачыла: кунакларны концерт, пылау һәм бүләкләр көтә

Чара 12:00 сәгатьтә Татмедиа бинасы каршындагы мәйданда башлана (Декабристлар ур., 2).

Бәйрәмдә шәһәр халкы һәм кунаклары республика массакүләм мәгълүмат чаралары вәкилләре белән аралаша, газета-журналлар сатып ала, яңа китаплар белән таныша һәм редакцияләр әзерләгән күңел ачу чараларында катнаша алачак.

Быел «СМИшная урамы»нда:

• Шаян ТВ,

• Татарстан ДТРК,

• Республика Татарстан,

• Ватаным Татарстан,

• Казанские ведомости,

• Шәһри Казан,

• Казан,

• Сөембикә,

• Татарстан китап нәшрияты һәм башка медиа вәкилләре катнашачак.

Кунаклар өчен рус һәм татар телләрендәге газета-журналлар, балалар һәм гаилә укуы өчен басмалар тәкъдим ителәчәк. Шулай ук урында ук матбугатка язылу мөмкинлеге дә булачак — моның өчен Россия Почтасы мәйданчыгы эшләячәк.

Яшь тамашачыларны «Шаян ТВ» телеканалы геройлары каршы алачак. Программада:

• лотереяләр,

• викториналар,

• караоке бәйгеләре,

• татлы бүләкләр һәм сувенирлар каралган.

13:00 сәгатьтә бәйрәм концерты башлана. Сәхнәдә Инсаф Ганибаев, Алинә Давыдова һәм Илгиз Шәйхразиев чыгыш ясаячак.

14:00 сәгатьтән кунакларны ачык һавада кайнар пылау, чәй һәм коймак белән сыйлаячаклар.

Ә 14:30 да массакүләм мәгълүмат чаралары хезмәткәрләренә махсус җиһазлар тапшыру тантанасы узачак.

Чарага керү — ирекле.