KazanForum агросәнәгать комплексы җитештерүчеләрен һәм чит ил партнерларын берләштерде

500дән артык бизнес-очрашу һәм нетворкинг‑сессияләр оешмаларның экспорт потенциалын ныгытты. Бу «Халыкара кооперация һәм экспорт» илкүләм проекты максатларына ирешүгә булыша, дип хәбәр итә Татарстанның Авыл хуҗалыгы һәм азык-төлек министрлыгы матбугат хезмәте.

Тагын бер әһәмиятле вакыйга – «Казан Хәләл Маркет». Чарада 9 илдән һәм Россиянең 11 субъектыннан йөздән артык компания катнашты, ә килүчеләр саны 34 767 кешегә җитте. Ярминкә хәләл-продукциянең потенциалын күрсәтү һәм яңа эшлекле элемтәләр булдыру өчен нәтиҗәле мәйданчык булды.

Чараны Татарстанның Эшмәкәрлеккә ярдәм фондының Экспортка ярдәм үзәге һәм «Агроэкспорт» оешмасы ярдәме белән республиканың Авыл хуҗалыгы һәм азык-төлек министрлыгы оештырды. Кече һәм урта бизнесның катнашуын илнең 8 төбәгеннән Экспортка ярдәм итү үзәкләре өстәмә рәвештә тәэмин итте.

Татарстанда «Хәләл» индустриясен үстерү системалы алып барыла: 2025 ел йомгаклары буенча, хәләл-продукция җитештерү 354,4 мең тоннага җиткән, ә бәясе – 149,1 млрд сум булган. Шул вакыт эчендә агросәнәгать комплексы экспорты 539,4 млн доллар булган, аның 45 млн доллары хәләл-продукциягә туры килә. Мәгълүматларга караганда, апрель ае өчен экспорт 122,4 млн долларга җиткән инде, шул исәптән хәләл-экспорт 8,3 млн доллар булган.

Республикада хәләл-продукция җитештерүчеләрнең тотрыклы секторы оешты, алар ит һәм сөт продукцияләрен, ярымфабрикатлар, икмәк-күмәч һәм кондитер ризыклары, шулай ук эшкәртүнең аерым тармакларын һәм эчемлекләрне колачлый. 30дан артык муниципаль районда Татарстан Диния нәзарәтенең «Хәләл» стандарты комитеты линиясе буенча сертификатлар алуда җитештерү бәйләнеше җайга салынган.

Татарстан хәләл-продукциясенең төп импортерлары: БДБ илләре, Монголия, Бразилия, Гыйрак, Мисыр, Согуд Гарәбстаны һәм Берләшкән Гарәб Әмирлекләре.