КФУда «Төрки лингвокультурология: проблемалар һәм перспективалар» конференциясе узды

Быел ул Габдулла Тукай һәм Каюм Насыйрига багышланган иде. Чараны ачу тантанасында Филология һәм мәдәниятара багланышлар институтының директоры Радиф Җамалетдинов һәм Г. Тукай исемендәге Милли мәдәният һәм мәгариф югары мәктәбе деканы Рамил Мирзаһитов сәламләү сүзе белән чыктылар. Соңрак, пленнар утырышы дәвамында, филология фәннәре докторы, профессор  Әлфия Йосыпова Каюм Насыйриның лексикография өлкәсендәге эшчәнлеге, ә гомуми тел белеме һәм тюркология кафедрасы доценты Раушания Нурмөхәммәтова галимнең этнография өлкәсендәге эшчәнлеге турында сөйләп чыктылар.

Конференция халыкара статусына ия булганга биредә чит илләрдән дә катнашучылар байтак. Мәктәп укучылары, студентлар, магистрантлар һәм аспирантлар шушы конференциядә чыгыш ясап, сертификатларга ия булдылар, аларның докладлары тиздән махсус фәнни җыентыкта дөнья күрәчәк.

Мәрьям Ибраһимова