Көчле буран һәм бозлавык: республикада хәрәкәт чикләнергә мөмкин

Шуңа бәйле рәвештә Татарстан Дәүләт автоинспекциясе машина йөртүчеләргә мөһим кисәтү белән мөрәҗәгать итте.

ЮХИДИ вәкилләре машина йөртүчеләргә мөмкин кадәр торак пунктлардан читкә чыкмаска, ерак юлга кузгалудан тыелып торырга киңәш итә. Шулай ук шәхси автомобильләрдән файдаланудан вакытлыча баш тарту сорала.

Синоптиклар фаразлавынча, 20 февральдә республикада:

* көчле кар явачак,
* буран чыгачак,
* җил тизлеге секундына 18 метрга кадәр җитәчәк,
* юлларда көчле бозлавык барлыкка киләчәк.

Мондый шартларда күрү мөмкинлеге начарая, юлларда бозлавык барлыкка килә, авария куркынычы бермәбер арта.

Юлга чыгарга мәҗбүр булучыларга аеруча сак булу, тизлекне киметү һәм дистанцияне саклау киңәш ителә.

Иң мөһиме — иминлек. Буранлы көндә ашыгу фаҗигагә китерергә мөмкин.