Магнит давыллары саны буенча рекорд куелган

2025 ел соңгы дистә елда магнит давыллары иң еш күзәтелгән ел булды. Шулай ук геомагнит яктан актив көннәр саны соңгы 20 елда иң югары дәрәҗәгә җитте. Бу хакта Россия Фәннәр академиясенең Кояш астрономиясе лабораториясе хәбәр итте.

Ел башыннан алып, 358 көн эчендә, Җирдә 69 магнит бураны теркәлгән. Бу 2024 ел белән чагыштырганда (44 очрак) якынча 1,5 тапкырга күбрәк. Геомагнит яктан актив көннәр саны тагын да ныграк арткан: 2025 елда мондый көннәр 164кә җиткән, ә 2024 елда алар нибары 94 булган. Үсеш 75 процент тәшкил итә.

Магнит бураннары саны буенча охшаш күрсәткечләр соңгы тапкыр 2015 һәм 2016 елларда күзәтелгән. Ул елларда 79 һәм 69 магнит бураны булган. Белгечләр фикеренчә, ел ахырына кадәр 2016 ел күрсәткечләре узып кителергә дә мөмкин, чөнки хәзерге вакытта Кояштагы зур корональ тишекләр Җиргә тәэсир итүен дәвам итә. Геомагнит актив көннәр саны буенча югарырак нәтиҗә 2005 елда теркәлгән — ул вакытта 169 шундый көн булган.

Белгечләр магнит активлыгының артуын Кояшта корональ тишекләрнең гадәттән тыш күп булуы белән аңлата. Плазма тыгызлыгы түбән булган мондый урыннар 2025 елның беренче айларыннан ук актив рәвештә барлыкка килә башлаган. 

Корональ тишекләр саны кимү билгеләре әлегә күзәтелми. Шуңа күрә белгечләр магнит давылларының югары активлыгы 2026 елның беренче айларында да сакланырга мөмкин дип фаразлый.