#Кыскача яңалыклар 14 август 2026, 16:24

Мәктәп укучыларының өй эшенә дә вакыт чикләнгән

14 август 2026, 16:24

Мәктәп укучысы өй эшләрен башкаруга көненә 3,5 сәгатьтән артык вакыт сарыф итәргә тиеш түгел. Бу — 9—11нче сыйныф укучылары өчен билгеләнгән иң югары чик.

Скопировать ссылку

Мәгариф министрлыгы эксперты Максим Костенко сүзләренчә, өй эшләренә бирелгән вакыт нормативлары балаларның яшь һәм психофизиологик үзенчәлекләрен исәпкә алып билгеләнгән һәм Роспотребнадзор белән килештерелгән.

Укучылар өчен нормативлар түбәндәгечә:
* 2—3нче сыйныфлар — 1,5 сәгатькә кадәр;
* 4—5нче сыйныфлар — 2 сәгатькә кадәр;

* 6—8нче сыйныфлар — 2,5 сәгатькә кадәр;
* 9—11нче сыйныфлар — 3,5 сәгатькә кадәр.

Ә беренче сыйныф укучыларына өй эше бөтенләй бирелергә тиеш түгел. Моннан тыш, мәктәпләргә беренче сыйныф укучылары өчен чәршәмбе яки пәнҗешәмбе көннәренең берсен җиңеләйтелгән уку көне итү тәкъдим ителә. Бу көнне балаларның уку йөкләнеше катлаулырак фәннәрне киметү хисабына азайтылырга тиеш.

Белгечләр билгеләп үткәнчә, өй эше баланың буш вакытын тулысынча алып тормаска, уку белән ял арасында баланс сакланырга тиеш.

Кызыклы яңалыкларны күзәтеп бару өчен безнең МАХ каналына кушылыгыз.