Мәктәпләрдә икенче чит тел мәҗбүри булмаячак — Мәгариф министрлыгы яңа кагыйдәләрне ачыклады

Бу хакта РИА Новости танышкан Россия Федерациясе Мәгариф министрлыгы документ проектына сылтама белән хәбәр итә.

Проект нигезендә, икенче чит телне укучылар теләге буенча гына өйрәнә алачак. Моның өчен ата-аналардан яки законлы вәкилләрдән гариза булу, шулай ук мәктәптә тиешле шартлар һәм укыту ресурслары булу зарур. Бу кагыйдә Татарстан мәктәпләренә дә кагылачак.

Элегрәк икенче чит телне мәҗбүри кертү ихтималы турында мәгълүмат таралган иде. Әмма яңа документта әлеге фән мәҗбүри дисциплиналар исемлегенә кертелмичә калуы төгәлләштерелә.

Шул ук вакытта, март аенда Максим Костенко — В.С. Леднев исемендәге укыту эчтәлеге һәм методлары институты җитәкчесе — Мәгариф министрлыгы тарафыннан 10–11 сыйныфлар өчен яңа белем бирү стандарты әзерләнүен хәбәр иткән иде. Ул стандарт 2027 елның 1 сентябреннән гамәлгә керергә тиеш.

Проект буенча, югары сыйныфларда өйрәнеләчәк төп һәм профиль фәннәр исемлегенә рус теле, әдәбият, туган тел һәм әдәбият, чит тел, икенче чит тел, математика, информатика, тарих, җәмгыять белеме, география, физика, химия, биология, Ватанны саклау һәм иминлек нигезләре, шулай ук физик культура керә.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.