Машина йөртүчеләрне кисәтәләр: Татарстан юлларында бозлавык көтелә

Якын көннәрдә Татарстанда һава торышы кискен үзгәрәчәк. Синоптиклар фаразлавынча, 3 һәм 4 ноябрьдә бераз яңгыр явачак. 5 ноябрьдә юеш кар рәвешендә аз күләмдә явым-төшем көтелә. 6 һәм 7 ноябрьдә дә юеш кар явачак, урыны белән кыска вакытлы буран булырга мөмкин. Шулай ук 3 ноябрьдән 7 ноябрьгә кадәр томан фаразлана.

Төнлә һава температурасы тискәре күрсәткечләргә кадәр төшәчәк. Явым-төшем һәм салкын һава торышы нәтиҗәсендә юлларда бозлавык барлыкка килергә мөмкин.

Шул уңайдан машина йөртүчеләргә түбәндәге куркынычсызлык кагыйдәләрен үтәргә киңәш ителә:

- Автомобильнең техник торышын, аеруча тормоз системасын һәм шиннарның торышын тикшерергә.

- Тышкы яктырту приборларының төзеклегенә инанырга.

- Хәрәкәт тизлеген һава торышына һәм юл шартларына карап сайларга.

- Кискен маневрлардан, бигрәк тә каршы як полосага чыгу белән бәйле хәрәкәтләрдән тыелырга.

Җәяүлеләргә дә сак булырга кирәк: киемнәрендә яктылыкны кире кайтаручы элементлар куллану һәм аларның машина йөртүчеләргә яхшы күренүен тәэмин итү мөһим.

Юлларда сак булыгыз! Үзегезнең һәм якыннарыгызның иминлеген кайгыртыгыз.