Махсус хәрби операциясе зонасындагы 90 танк дивизиясенең 80 нче полкында блиндажлы мәчет ачылды

Полк имамы Мөхәммәт хәзрәт Хәйруллаев белән бергә алар «Батыр» батальонында, 90 нчы танк дивизиясендә һәм башка хәрби частьләрдә, алты госпитальдә булып, сугышчыларга кече Ватаннан һәм Мөфти Камил хәзрәттән җылы сәлам тапшырдылар, аларга үгет-нәсыйхәтләр бирделәр, намаз укыдылар, дога кылдылар, хәрбиләрнең сугышчан рухын күтәрделәр.

Бигрәк тә 90 танк дивизиясенең 80 нче полкы хәрбиләре янында булу истәлекле булды: монда Диния нәзарәтенең полк имамы Мөхәммәд хәзрәт тырышлыгы һәм командование ярдәме белән блиндажлы мүсәллә ачылды. 15 кв. метр мәйданлы "мәчет" 90 танк дивизиясенең 80 нче полкының даими җыелу урында корылган. Мәчетнең стеналары һәм идәннәре ак материал белән тышланган. Идәнгә келәмнәр җәелгән. Диния нәзарәте вәкилләре мәчеткә бүләкләр: намазлыклар, шәмәил, стена сәгате, китаплар бүләк иттеләр. Биредә намазлар укылачак һәм солдатлар белән рухи әңгәмәләр үткәреләчәк.

Сугышчылар Марат хәзрәт һәм 90 танк дивизиясе командирының хәрби-сәяси эшләр буенча урынбасары подполковник Газыйм Классов белән бергә мәчетне тантаналы рәвештә ачтылар һәм беренче җәмәгать намазын укыдылар. Мәчет ачылышында шулай ук Үзәк хәрби округ командующиеның дин тотучылар белән эшләү буенча ярдәмчесе Андрей Канев атакай, Роман атакай, башка офицерлар һәм мөселман сугышчылары катнашты. Хәрби хезмәткәрләр белән очрашу барышында Марат хәзрәт командованиегә һәм мәчет төзелешендә катнашучыларга, солдатларның үтенечләренә колак салган өчен рәхмәт белдерде.

Очрашу уңаеннан Татарстан Мөфтие Камил хәзрәт Сәмигуллинга һәм Диния нәзарәте казые Марат хәзрәт Мәрданшинга 90 нчы танк дивизиясе командиры Россия Герое генерал-майор Александр Нилов исеменнән Рәхмәт хатлары тапшырылды.

Шунысын әйтергә кирәк: бу фронт сызыгында ачылган беренче мәчет түгел. Ел башында Татарстан Мөфтие Камил хәзрәт Сәмигуллин катнашында «Батыр» батальоны даими җыела торган урында 18 кв.метр мәйданлы "Нургали" блиндажлы мәчете ачылды. Моннан тыш, "Каһарман" акциясе кысаларында Диния нәзарәте махсус хәрби операция зонасына “тәгәрмәчле” ике мәчет җибәрде.