Миңнеханов Россия көне алдыннан Казан Кремлендә дәүләт бүләкләре тапшырды

Югары бүләк белән билгеләп үтерүчеләр арасында – махсус хәрби операция катнашучылары, җәмәгать эшлеклеләре, күп балалы ата-аналар һәм төбәк предприятиеләре хезмәткәрләре.

«Бүген без зур бәйрәм – Россия көне алдыннан дәүләт бүләкләрен тапшырабыз. Бу бәйрәмне без горурлык һәм яңа җиңүләргә ныклы ышаныч белән каршылыйбыз. Махсус хәрби операция шартларында без көчле һәм бәйсез Россиянең, гражданнарның бердәмлегенең, хәрби бурычын намус белән үтәүче Ватанны саклаучыларның батырлыгы һәм фидакарьлегенең кыйммәтен аеруча ачык аңлыйбыз», – дип белдерде Миңнеханов.

Ул ассызыклаганча, Татарстан икътисадны үстерүне һәм гражданнарның тормыш сыйфатын яхшыртуны дәвам итә.

«Республиканың уңышлары – барлык татарстанлыларның хезмәте нәтиҗәсе. Бүген залда Россиягә тугры булу һәм хезмәт итү, эшкә җаваплы һәм намуслы карау, куелган максатларны нәтиҗәле үтәү үрнәге булган кешеләр. Сезнең һәрберегез төбәкнең һәм гомумән илнең чәчәк атуына зур өлеш кертә», - дип мөрәҗәгать итте Татарстан Республикасы Рәисе.

Федераль һәм республика дәрәҗәсендәге бүләкләргә барлыгы 41 кеше лаек булды. Рөстәм Миңнеханов аларга шәхсән үзе орден һәм медальләр тапшырды.

«Хезмәтемне шулай югары бәяләүләре өчен рәхмәт әйтергә телим. Бүгенге бүләк – Яшел Үзән проектчылары коллективының күпьеллык уртак эшенең нәтиҗәсе. Аны зур бәйрәм – Россия көне алдыннан алу аеруча күңелле», - диде чыгышында «Яшел Үзән проект-конструкторлык бюросы» АҖ генераль директоры Евгений Жирков.

Бүләккә лаек булучылар арасында махсус хәрби операция катнашучылары да булды. Аларны зал аеруча көчле алкышлар белән каршы алды.

«Барыгызны да Россия көне белән котлыйм. Махсус операция хәрбиләренә ярдәм күрсәтүгә өлеш кертүчеләргә аеруча рәхмәт белдерәм. Зур рәхмәт сезгә», - дип мөрәҗәгать итте җыелганнарга кече лейтенант, 37нче мотоукчылар полкы снайперлар укчы ротасы командиры Сергей Минцев.

Тантана тәмамлангач, бүләкләнүчеләр Татарстан Рәисе белән күмәк фотога төште.

Чыганак: Татар-информ