Миңнеханов: Татарстан үз алдына бөтен коммуналь инфраструктураны яңарту бурычын куя

Бу хакта «Бердәм Россия» нең алдан тавыш бирү кандидатларының партиянең җирле һәм беренчел бүлекләре секретарьлары белән очрашуы вакытында ТР рәисе Рөстәм Миңнеханов белдерде.

"Бүген Татарстан яңа амбициоз бурыч куя: барлык коммуналь инфраструктураны модернизацияләү һәм яңарту. Бу аның ышанычлылыгын арттырырга һәм татарстанлылар өчен уңайлы тормыш шартлары тәэмин итәргә мөмкинлек бирәчәк", - дип билгеләде ул.

Республиканың үсеш юлы турындагы чыгышында Миңнеханов шулай ук махсус хәрби операциядә катнашучыларга һәм аларның гаиләләренә ярдәм итүгә, социаль йөкләмәләрне үтәүгә аерым тукталды.

"Без бу юнәлештә эшне дәвам итәчәкбез. Социаль объектлар төзиячәкбез: поликлиникалар, мәктәпләр, балалар бакчалары, юллар, шул исәптән авыл җирлекләрендә. Җәмәгать урыннарын һәм ишегалларын төзекләндерүне дәвам итәчәкбез", - дип өстәде Татарстан Рәисе.

Моннан тыш, республика икътисадын үстерүгә, предприятиеләргә һәм эшмәкәрләргә ярдәм итүгә аерым игътибар биреләчәк.

Май аенда Татарстанда «Яшәү өчен инфраструктура» милли проекты кысаларында 36 коммуналь инфраструктура объектын модернизацияләү башланачак. Инициатива республика рәисе Рөстәм Миңнеханов башлап җибәргән программа буенча гамәлгә ашырыла.

Татарстан төзелеш, архитектура һәм торак-коммуналь хуҗалык министры Марат Айзатуллин хәбәр иткәнчә, 2025 елда төбәктә 100 объект исемлеге расланган, аларның бер өлеше федераль проектка кергән. Эшләр Яр Чаллы, Әлмәт, Бөгелмә, Зеленодольск, Лениногорск һәм Чистай районнарында планлаштырылган.

Финанслауның гомуми күләме 11 млрд сумнан артып китә, шул исәптән милли проект акчаларыннан 3 млрд сумнан артык. Программа шәһәр һәм авыл инфраструктурасын комплекслы үстерүгә юнәлдерелгән.

Лениногорскида «Яшәү өчен Иинфраструктура» милли проекты кысаларында суүткәргечне реконструкцияләү дәвам итә. 1990 нчы елларда төзелгән 30,5 км озынлыктагы суүткәргеч челтәре, бик нык тузганлыктан, капиталь ремонт таләп иткән.

Проект 2026-2027 елларга исәпләнгән. Агымдагы елда 253,7 млн сумга 7,5 км торбаүткәргеч алмаштыру планлаштырыла. Эшләр тәмамланганнан соң, яңартылган система Лениногорскида һәм сигез авыл җирлегендә яшәүче 68 мең кешене ышанычлы су белән тәэмин итәчәк, шулай ук янгынга каршы системаның нәтиҗәлелеген арттырачак.

«ТР инженерлык челтәрләренең баш идарәсе» ДКУ мәгълүматлары буенча, бүгенгә 4,4 км участокта җир эшләре башкарылган һәм 1 км дан артык яңа торбалар салынган. Гомуми алгарыш 42% тәшкил итә, этапны тәмамлау 30 августка планлаштырылган.

2025 елда Татарстан рәисе Рөстәм Миңнеханов инициативасы белән өстәмә рәвештә финанслау күләме 8,5 млрд сум булган республика программасы эшләтеп җибәрелде.

Бөгелмәдә 8,8 км озынлыкта яңа суүткәргеч челтәрләр төзелә башлады. Объект «Яшәү өчен инфраструктура» милли проекты программасына кертелгән, аны гамәлгә ашыруга 234,4 млн сум бүлеп бирелгән.

Татарстан инженерлык челтәрләренең баш идарәсендә аңлатуларынча, 1969 елда төзелгән иске суүткәргеч нык тузган һәм алыштыруны таләп итә. Яңа челтәрләр Бөгелмәне, Таллы Бүләк бистәсен һәм «В»микрорайонын тотрыклы су белән тәэмин итәчәк. Бу 83 мең кешенең тормыш сыйфатын яхшыртачак, аварияләр һәм су белән бәйле өзеклекләрне киметәчәк.

Моннан тыш, модернизация шәһәр инфраструктурасын үстерү өчен шартлар тудырачак. Бүгенгә 4,5 км торба салынган инде. Эшләр план буенча бара, объектның әзерлеге – 48%. Төзелешне сентябрь ахырына кадәр төгәлләргә ниятлиләр.

ТР Төзелеш министры Марат Айзатуллин сүзләренә караганда, 2025 елда илкүләм проект кысаларында республикада 3,2 млрд сумлык 36 объект яңартылачак, шуларның 1,5 млрд – Татарстан акчалары.

Шулай ук быел бюджеты 8,5 млрд сум булган 100 объектны үз эченә алган республика программасы старт алды. Барлыгы 2 программа буенча 45 муниципалитетта 11,7 млрд сумлык 136 инфраструктура объекты яңартыла.