Мошенникны ачыкларга ярдәм итә торган стоп-сүзләр: нинди фразалардан сакланырга?

Сбербанк идарәсе рәисе урынбасары Станислав Кузнецов мошенниклар сөйләмендә еш очрый торган төп «стоп-фразаларны» атады. 

Белгеч фикеренчә, түбәндәге сүзләр һәм әйтелмәләр ишетелсә, аеруча сак булырга кирәк:

* «ВСУ», «ФСБ», «МВД»;

* «куркынычсыз счет»;

* «СМСтан килгән код»;

* «карта мәгълүматлары»;

* «акчагыз куркыныч астында»;

* «акчаны күчерергә/тапшырырга кирәк»;

* «җинаять җаваплылыгы яный»;

* «террорчылыкны финанслау». 

Мошенникларның төп максаты — кешене куркыту

Мондый сөйләшүләрдә җинаятьчеләр еш кына үзләрен банк хезмәткәре, полиция яки башка хокук саклау органы вәкиле итеп таныштыра. Алар кешегә счетындагы акчаның имештер куркыныч астында булуын әйтә һәм аны «куркынычсыз счетка» күчерергә тәкъдим итә.

Үзәк банк та кисәтә: банк, полиция яки башка оешма хезмәткәре булып шалтыратып, кешедән карта мәгълүматларын сорау яки акча күчерүне таләп итү — мошенниклык билгесе. Мондый очракта сөйләшүне шунда ук туктатырга кирәк.

Сезгә үзләре шалтыратса — сак булыгыз

Станислав Кузнецов сүзләренчә, әгәр аралашуны сез башламагансыз икән, ә сөйләшү акча мәсьәләсенә барып тоташа, шул ук вакытта сезне ашыктыралар, басым ясыйлар яки куркыталар икән — бу мошенниклыкның ачык билгесе.

Шик туган очракта белгеч аралашуны дәвам итмәскә киңәш итә. Иң дөрес адым — сөйләшүне туктату һәм мөһим мәгълүматларны әйтмәү.