Музей татарча уйларга да, сөйләргә дә өйрәтә

Әнә, Шәриф Камал музее 5-7 яшьлек балаларны сөйләм культурасына өйрәтергә керешкән. Дөрес, әлегә тәҗрибә нигезендә. Әмма шулай булуга карамастан бу әти-әниләрдә зур кызыксыну тудырган.   

– Бу эш безнең өчен дә яңалык, – ди татар әдәбияты тарихы музее һәм   Шәриф Камал мемориаль фатиры мөдире Айдар Шайхин. – Әлегә методикасын эшләп кенә киләбез. Без балаларны татарча сөйләргә өйрәтергә кирәген беләбез һәм тәҗрибәләр туплап, бу эшне камилләштерү юнәлешендә эш алып барабыз. Әлегә кечкенәләр төркеме белән эшлибез.

Билгеле, тел белү балалар өчен генә түгел, яшүсмерләр өчен дә кирәк. Әмма бала үскән саен аның белән эшләү бераз катлаулырак. Шуңа күрә аларга кызык булган форматны эзләргә кирәк. Гомумән, Россия музейларында яшүсмерләрнең клублары, түгәрәкләре эшләп килә. Араларында бик уңышлы эшләүчеләре дә бар.

– Ләкин безгә татарча аралашырга теләге булган татар яшүсмерләрен берләштерү кирәк, – диде спикер. – Яшүсмерләрне берләштерү максатыннан “Сәләт” лагеры һәм “Алдынгылар” хәрәкәте белән берлектә махсус проект уйлап табу юнәлешендә эшлибез. Музей тәкъдимнәргә, тәҗрибәләргә һәрвакыт ачык. Безнең музей мәйданында төрле форматларны сынап карарга була. Мисалга, “Идел” яшьләр үзәге белән берлектә музейда татарча өстәл уеннары кичәләре уздырабыз. Яшьләр өстәл уеннары уйнап, татарча аралашалар. Яшүсмерләргә бер-берсе белән татарча аралашу бик кирәк һәм без моны аңлыйбыз, шуңа күрә аларга кызык булган форматны эзлибез. Балаларын татарчага аралаштырырга теләүче әти-әниләр булса, безнең белән элемтәгә дә керә ала. Шәриф Камал музееның рәсми сайтында телефоннарыбыз бар. Шул ук ваккыутта социаль челтәрләр аша миңа да язарга була. Шалтыратыгыз, языгыз, без һәрвакыт аралашырга әзер.    

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.