Озак яшәү өчен 6 киңәш

Кешегә сәламәтлеген саклау өчен яхшы йокы, когнитив тренинглар, туклану һәм физик активлык балансы, файдалы стресс, хроник авыруларны профилактикалау кирәк, ди Пирогов университетының Россия геронтология фәнни-клиник үзәге директоры Ольга Ткачева.

Иң беренчедән, йөрәк-кан тамырлары авырулары, тазару, шикәр чире, деменция, буын авырулары кебек яшь белән бәйле хроник чирләрне кисәтү мөһим. Шул исәптән, сәламәт яшәү рәвеше алып бару, хроник авырулар үсешенә сәбәпче булган кайбер күрсәткечләрне: кан басымын, холестерин, глюкоза дәрәҗәсен, тән массасы индексын тикшереп торырга кирәк.

Икенчедән, психоэмоциональ сәламәтлекне кайгыртырга, уңай кәеф, эш һәм ял балансын сакларга, стресс белән көрәшергә кирәк, ди Ткачева.
Геронтолог билгеләп үткәнчә, гомерне озайта торган өченче фактор дип яхшы йокыны атарга мөмкин. Пирогов университетының Россия геронтология фәнни-клиник үзәге мәгълүматлары буенча, уртача 6-8 сәгать йоклаган кешеләр озаграк яши. 

-    Ягъни алты сәгатьтән азрак йоклау начар. Сигез сәгатьтән артык булса, шулай ук фаразлар начарая. Әмма индивидуаль вариацияләр булырга мөмкин, - ди Ткачева. 

Белгеч ассызыклаганча, гомерне озайту өчен, һичшиксез, когнитив тренинг кирәк. Кешегә, мәктәпне һәм институтны тәмамлаганнан соң да, белем алуын дәвам итү мөһим.

Шулай ук гомерне озайту өчен гармезис кирәк — бу организм өчен файдалы стресс, ул картаюны акрынайта, дип билгели белгеч. Мисал өчен, гашыйк булу – бик уңай стресс. Бу гомеребезне озайта торган әйбер. Шуңа күрә бу зыян китерми, ә ярдәм итә.

Гомерне озайту өчен шулай ук туклану һәм физик активлык балансы кирәк. Сез күпме калория сарыф итүгә карап ашарга тиеш. Әгәр син яхшы ашыйсың икән, димәк, син күп хәрәкәтләнергә дә тиеш, ди белгеч. Өстәвенә, мускуллар никадәр нык булса, кешеләр шулкадәр озаграк яши һәм яшьлекләрен саклый.