Педагогик вузларга керүчеләргә профильле БДИ кайта

Булачак укытучылар үзләре сайлаган белгечлеккә туры килгән профильле фән буенча БДИ тапшырачак. Бу хакта Россия мәгариф министры Сергей Кравцов хәбәр итте.

Министр сүзләренчә, мондый система элек тә гамәлдә булган. Әйтик, математика укытучысы булырга теләүче абитуриент математикадан, тарих укытучысы әзерләү юнәлешен сайлаучы тарихтан профильле имтихан тапшырган.

Соңрак әлеге таләптән баш тартканнар. Хәзер педагогик вузларга керүчеләр өчен профильле фән урынына мәҗбүри керү сынавы буларак җәмгыять белеме каралган.

2027 елдан исә элекке тәртипне кире кайтару планлаштырыла. Димәк, абитуриентның булачак һөнәре белән турыдан-туры бәйле фән буенча белемнәре кабул итү вакытында да исәпкә алыначак.

Шул ук вакытта 2027 елда БДИның үзенә масштаблы үзгәрешләр кертү планлаштырылмый. Сергей Кравцов моңа кадәр биремнәрне катлауландыру яки имтихан форматын җитди үзгәртү көн тәртибендә булмавын белдергән иде.