Питрәчтә йөк машинасы җәяүлеләр кичүенә бәрелгән: ике кеше зыян күргән

6 октябрь көнне сәгать 12:44тә Кощаково авылы тирәсендә Казан — Шәмәрдән юлында гадәттән тыш хәл турында хәбәр килгән. Беренчел мәгълүматларга караганда, «КАМАЗ» йөк машинасы җәяүлеләр кичүенең таянычына бәрелгән. Нәтиҗәдә конструкциянең терәге түзмәгән һәм кичү өлешчә юлга ишелгән.

Һәлакәт урынына коткаручылар, янгын сүндерүчеләр, ЮХИДИ хезмәткәрләре һәм ашыгыч ярдәм бригадасы килгән.

Һәлакәттә «КАМАЗ»ның 30 яшьлек йөртүчесе һәм 48 яшьлек пассажиры зыян күргән. Татарстан Сәламәтлек саклау министрлыгы мәгълүматлары буенча, аларның хәле уртача авырлыкта. Йөртүчене хастаханәгә алып киткәннәр, пассажир исә госпитализациядән баш тарткан.

Хәзерге вакытта Кощаково авылы янындагы юлда хәрәкәт чикләнгән. Машина йөртүчеләргә әлеге участоктан сакланырга һәм альтернатив маршрутлардан файдаланырга киңәш ителә.

Казаннан Шәмәрдән ягына баручыларга: М-7 трассасы буенча Кулаев һәм Питрәч авыллары аша участокны урап, аннан «Казан — Шәмәрдән» юлына чыгарга киңәш ителә.

Казанга таба хәрәкәт итүчеләргә: Ленино-Кокушкино аша Питрәчкә кадәр барып, аннары М-7 трассасы буенча Казан юнәлешендә хәрәкәт итәргә тәкъдим ителә.

Машина йөртүчеләргә маршрутны алдан планлаштырырга, тизлек режимын сакларга һәм юлда аеруча игътибарлы булырга киңәш итәләр.

Юлдагы хәрәкәтнең кайчан торгызылачагы өстәмә хәбәр ителәчәк.