Повесткалар электрон рәвештә дә килә: чакырылыш турында белергә кирәк бар нәрсә

Шул ук вакытта хәрби хезмәткә чакырылган гражданнарны озату элеккечә елга ике тапкыр — 1 апрельдән 15 июльгә кадәр һәм 15 октябрьдән 31 декабрьгә кадәр — гамәлгә ашырыла.

Чакырылыш «хәрби исәпкә алуның бердәм реестры» ярдәмендә үткәрелә. Повесткалар түбәндәге ысуллар белән тапшырыла:

• шәхсән — уку, эшләү яки яшәү урыны буенча;

• язмача — Россия почтасы аша;

• дәүләт хезмәтләре (Госуслуги) аша хәбәр итү һәм электрон реестр ярдәмендә.

Повестка, хәрби хезмәткә чакырылучының имзасы куелган, почта аша алынган яисә реестрда пәйда булган көннән соң бер атна узгач, тапшырылган дип санала.

Яңа гына хәрби кием кигән егетләргә махсус хәрби операциягә җибәрелү янамый: чакырылыш буенча хәрби хезмәт узучы хәрбиләр МХО бурычларын үтәү өчен җәлеп ителмәячәк, шулай ук Донецк һәм Луганск халык республикалары, Запорожье һәм Херсон өлкәләре территорияләренә дә юнәлтелмәячәк.