«Пушкин картасын» яңадан рәсмиләштерергә кирәк

Картадан туктаусыз файдалану өчен, аны алдан ук ВТБ банкына барып яңадан чыгартырга кирәк. Моны агымдагы елның 28 декабренә кадәр «Госуслуги Культура» кушымтасында яисә Почта банкы һәм ВТБ офисларында һәм кушымталарында эшләргә мөмкин, дип искәртә ТР Мәдәният министрлыгы матбугат хезмәте.

«Гаилә» милли проектына кергән «Пушкин картасы» 14 яшьтән 22 яшькә кадәрге яшьләргә театрларга, музейларга, концертларга, күргәзмәләргә һәм кинога бушлай йөрергә мөмкинлек бирә. Ел саен картага 5 мең сум өстәлә: 2 мең сумга кадәр киносеансларга сарыф итәргә була, калганы – теләсә нинди мәдәни вакыйгалар өчен куелган. 

2025 елда калган акча киләсе елга күчерелми, шуңа күрә алардан 31 декабрьгә кадәр файдаланырга кирәк. Билетларны алдан сатып алырга мөмкин-шул исәптән 2026 елда узачак чараларга да.

«2024 елда Татарстанда 321 меңнән артык үсмер «Пушкин картасын»а ия булган, бүген программада катнашучылар саны ай саен арта бара», – дигән ТР мәдәният министрының беренче урынбасары Юлия Әдһәмова.

Республика ведомствосы бәяләвенчә, «Гаилә» милли проекты яшьләр арасында мәдәниятне популярлаштыруда һәм гаилә кыйммәтләренә аңлы мөнәсәбәт формалаштыруда мөһим адым булды.

«Пушкин картасы» программасы ярдәмендә яшүсмерләр һәм яшьләр илнең бай мирасына кушылу мөмкинлеге ала, ә гаилә мәдәни ялы форматы гаилә әгъзалары арасында тирәнрәк һәм җылырак мөнәсәбәтләр булдырырга ярдәм итә, дип өстәделәр министрлыкта.