Татарстан халкы макулатура җыеп ил күләмендә лидерлар арасына кергән

Республика 89 төбәк арасында бишенче урынны яулаган. Бу хакта Татарстан Экология һәм табигый байлыклар министрлыгы хәбәр итә.

1 декабрьдә старт алган кышкы сезонда республика халкы 120 тоннага якын — 119 972 килограмм макулатура җыйган. Гомумән алганда, акциядә ил буенча 2,4 миллионнан артык кеше катнашкан, ә җыелган кәгазьнең гомуми күләме 68,6 мең тоннадан арткан.

«БумБатл» — «Экосистема» Бөтенроссия экологик иҗтимагый хәрәкәте эгидасы астында үткәрелә торган масштаблы проект. Ул күптән инде гадәти макулатура җыю кысаларыннан чыгып, төрле яшьтәге һәм төрле һөнәр ияләрен әйләнә-тирә мохитне саклау идеясе тирәсендә берләштергән зур экологик хәрәкәткә әверелгән.

Акция экологик файданы ярыш рухы белән берләштерә. Катнашучылар шәхси һәм команда зачетында көч сынаша, шулай ук үз төбәкләренең экологик рейтингына өлеш кертә ала. 2025 елдан башлап «БумБатл» ел әйләнәсе уздырыла, димәк, теләгән һәркем теләсә кайсы вакытта акциягә кушыла ала.

Министрлыкта билгеләп үтүләренчә, Татарстанның лидерлар бишлегенә керүе — республика халкының югары экологик мәдәниятен һәм җаваплылыгын күрсәтә. Җыелган һәр килограмм макулатура — саклап калынган агач һәм чүплекләргә төшмәгән калдык дигән сүз.

Республикада балалар бакчаларында, мәктәпләрдә, көллиятләрдә, югары уку йортларында, предприятие һәм дәүләт учреждениеләрендә  макулатура җыю актив оештырылган. Акциягә кушылырга теләүчеләр «БумБатл»ның рәсми сайтындагы интерактив карта аша якындагы кабул итү пунктын таба ала.

Шәхси һәм гаилә зачетларында арадаш нәтиҗәләр елның һәр фасылында ясалачак, ә команда һәм төбәк рейтингының ахыргы нәтиҗәләре 2026 елның мартында игълан ителәчәк.

Экологик хәрәкәт дәвам итә һәм Татарстан инде бүген үк үзенең лидер икәнен раслады.