Ришат Төхвәтуллин: «Азаматыбызны җирләп кайтып киләбез. Яшь килеш үлеп китүе күңелебезне тырный»

Мәгълүм булганча, ул агуланган какы ашаганын белмичә, берничә көн хәлсезләнеп йөри дә, комага китеп, аңына килә алмыйча, бакыйлыкка күченә. Бүген исә аны җирләделәр. Ришат Төхвәтуллин да төркеме белән Азаматны соңгы юлга озатырга кайтты.

– Азаматыбызны күмеп кайтып киләбез. Әти-әнисенә сабырлык телисе килә, нишләтәсең инде, яшь килеш үлеп китүе күңелебезне тырный. Шулай насыйп күрәсең, Аллаһы маңгаена язган гомер бик кыска булган, урыны оҗмахта булсын. Азамат, без сиңа бик рәхмәтле, рәхмәтләр әйтеп озаттык, – дип сәхнәдәше белән бәхилләшүен җиткерә Ришат үзенең сәхифәсендә. – Азамат безнең төркемдә иң беренче көннәреннән үк үзен профессиональ яктан күрсәтте. Безгә иң оста биюче кирәк иде, Илгиз аны үз урынына алып килде, Илгиздән дә оста биюче булмас кебек тоелган иде, әмма Азамат бик сәләтле, тырыш егет булып чыкты. Аңа дөрес тәрбия бирелгән иде. Төркемдәшләребез синең белән саубуллашырга килде, Азамат...

Билгеле булганча, Азамат Заһиров туган ягы – Борайга кайтып китә, якыннарына ярдәм итәргә ниятли ул. Әмма колхоз кырларына химикат сибелгәнен, ягъни иген басуларның агуланганын белмичә, какы җыя. Кырдагы хәлләрнең авыл тирәсенә җил алып килгәндерме, билгесез. Берничә көн буена температурасы югары күтәрелсә дә, Азамат үз саулыгына әллә ни игътибар бирми күрәсең, үтәр дигәндер дә... Тик үтми, ашыгыч рәвештә аны хастаханәгә салырга туры килә. Ике атна буе комада ятканда табиблар да ниләр генә эшләп карамый, әмма хәлләр уңай якка үзгәрми. Эчке әгъзалары берәм-берәм эшләүдән туктый. Бик кызганыч. Яшь гомереннән өзалгән Азамат Заһиров якыннарының, туганнарының кайгысын уртаклашабыз. Урының оҗмах түрләрендә булсын, Азамат…

Гөлнур Шәрәфиева әзерләде