Россиядә 1 апрельдән ак икмәккә яңа ГОСТ гамәлгә керә: нәрсәләр үзгәрә?

Бу хакта РИА Новости басмасы Росстандарт документына сылтама белән хәбәр итә.

Яңа стандарт нигезендә хәзер овал формадагы икмәк пешерү рөхсәт ителә. Моннан тыш, массасы 500 граммнан кимрәк булган ак икмәк җитештерү дә мөмкин булачак. Элек исә аның авырлыгы кимендә 0,5 килограмм булырга тиеш иде.

Предприятиедә икмәкне мичтән алганнан соң саклау вакыты, элеккечә үк, 10 сәгатьтән артмаска тиеш. Ә менә ваклап сату челтәрендә сату срогына кагылышлы тәкъдимнәр яңа ГОСТтан төшереп калдырылган. Элек алар мичтән алынганнан соң 24 сәгать тәшкил итә иде.

Документта шулай ук ак икмәк әзерләү өчен кулланыла торган чимал исемлеге дә күрсәтелгән. Алар арасында: югары, беренче һәм икенче сортлы бодай икмәк пешерү оны, прессланган икмәк пешерү чүпрәсе, аш тозы, эчә торган су һәм ак шикәр бар. Моннан тыш, «он эшкәртү өчен матдә», «антиоксидант» функциональ классларына караган азык өстәмәләрен, шулай ук фермент препаратларын (шул исәптән норматив документ нигезендә комплекслы азык өстәмәсе составында) кулланырга рөхсәт ителә.

Яңа стандарт халыкара нормаларга туры китереп эшләнгән һәм 1 апрельдән үз көченә керәчәк. Ул 1986 елдан бирле гамәлдә булган, әле СССР чорында ук кабул ителгән ГОСТны алыштыра.

Россиядә күпчелек ГОСТлар киңәш рәвешендә кулланыла һәм җитештерүчеләр өчен киңәш булып хезмәт итә. Әмма кайбер очракларда алар мәҗбүри дә булырга мөмкин — әгәр кануннарда, контрактларда яки техник регламентларда турыдан-туры күрсәтмә булса.

Билгеле булганча, Татарстанда «Азык-төлек иминлеген технологик тәэмин итү» илкүләм проекты гамәлгә ашырыла.