Россиядә 30 апрельдән маникюр һәм педикюрга яңа ГОСТ гамәлгә керә

Бу хакта РИА Новости агентлыгына Росстандартта хәбәр иткәннәр.

Яңа стандартта әлеге хезмәтләрне күрсәтү тәртибе җентекләп тасвирлана. Документта «типик технологик процесс картасы» төшенчәсе беркетелә. Анда маникюр, педикюр һәм шушы өлкәгә караган башка хезмәтләрне башкару эзлеклелеге, кулланыла торган препаратлар, материаллар, инструментлар һәм җиһазлар исемлеге, шулай ук процедураның якынча вакыты күрсәтелә.

Технологик карталар классик, аппарат, препарат һәм катнаш маникюр-педикюр төрләре өчен, кул һәм табан тиресен карау, ясалма тырнакларны ныгыту, тигезләү, модельләштерү, коррекцияләү, декоратив каплау һәм алыну хезмәтләре өчен эшләнгән.

Мәсәлән, классик маникюр 45–60 минут дәвам итәргә тиеш дип күрсәтелә. Процедура тырнакның кырыен формалаштырудан һәм кутикуланы юешләтүдән башлана. Аннары кутикуланы йомшарту һәм эшкәртү, тырнак пластинасын шомарту һәм ялтырату этаплары үтәлә. Ахырда тырнаклар чистартыла һәм кутикула яңадан юешләтелә.

Натураль тырнакларны тигезләү өчен 70–90 минут вакыт каралган. Стандарт буенча башта тырнак чистартыла һәм грунтовка ясала, аннары база катламы салына. Соңыннан гель катламы кулланыла, тырнак формалаштырыла һәм шомартыла. Финал этапта ялтыравык бирүче катлам салына һәм кутикула эшкәртелә.

Документта шулай ук тырнак шаблоннары, типслар, акригель, клиент картасы һәм профессиональ инструментларга аңлатмалар бирелгән.

Росстандартта билгеләп үтүләренчә, стандартның төп максаты — хезмәтләрнең сыйфатын һәм иминлеген арттыру, кулланучылар сәламәтлеген саклау һәм базарда намуслы көндәшлек шартлары булдыру.

Шунысы мөһим: әлеге ГОСТ мәҗбүри түгел. Ул ирекле характерда булачак һәм оешмалар яки шәхси эшмәкәрләр тарафыннан үз теләге белән яисә килешүләрдә аңа сылтама булган очракта гына кулланылачак.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.