Россиядә «Бөек Җиңү балалары» дигән яңа статус барлыкка килергә мөмкин

Инициативаны Дәүләт Думасының социаль сәясәт комитеты рәисе Ярослав Нилов җитәкчелегендәге депутатлар әзерләгән. Документ балачагы Бөек Ватан сугышы елларына (1928 елның 22 июненнән 1945 елның 9 маена кадәр) туры килгән гражданнарга ярдәм итүгә юнәлдерелгән.

Аңлатма язуыннан күренгәнчә, бу гражданнарны рәсми рәвештә аерым социаль төркем итеп танырга һәм аларга өстәмә социаль ярдәм чараларын беркетергә тәкъдим ителә. Дәүләт гарантияләре программасы кысаларында түләүсез медицина хезмәте күрсәтү, рецептлар буенча дарулар белән тәэмин итү, теш протезлары ясау һәм ремонтлау, ваклап сату һәм көнкүреш хезмәтләре тәкъдим итүдә чиратсыз хезмәт күрсәтү, шулай ук социаль хезмәт күрсәтү учреждениеләрендә чиратсыз кабул итү кебек чаралар турында сүз бара.

«Югарыда күрсәтелгән социаль ярдәм чараларына өстәмә буларак, Россия Федерациясе субъектлары социаль ярдәмнең башка чараларын РФ субъектлары законнары һәм алар нигезендә кабул ителә торган норматив хокукый актлар белән билгели ала», – диелә документта.

«Бездә Бөек Ватан сугышында катнашучылар һәм инвалидлар саны елдан-ел кими бара - бүгенге көндә алар нибары 10,5 мең кеше. Ә вакыт аяусыз. Һәм киләсе социаль төркем – безнең гражданнар, сугыш чорының бөтен авырлыклары алар өлешенә туры килгән, кемнәрдер соңыннан илне торгызган, сәнәгать һәм авыл хуҗалыгын күтәргән, дәүләтнең оборона сәләтен һәм иминлеген тәэмин иткән, алар нәкъ менә – «Сугыш балалары», - дип шәрехләде инициативаны Нилов.

Быел Россиядә Бөек Ватан сугышында Җиңүнең 80 еллыгы билгеләп үтелә. Шулай ук РФ Президенты Владимир Путин карары белән 2025 ел Ватанны саклаучылар елы дип игълан ителде. Күптән түгел ТР Рәисе Рөстәм Миңнеханов сугыш ветераннарына бүләкләр тапшырды. Ул Россиянең бүгенге казанышларында аларның һәркайсының зур өлеше булуын билгеләп үтте.

Чыганак: Татар-информ