Россиядә торак сатып алганда салым кайтаруны өч тапкыр арттырырга тәкъдим иттеләр

Канун проекты Россия Хөкүмәтенә карау өчен җибәрелгән.

Әгәр тәкъдим кабул ителсә, фатир яки йорт сатып алган кешегә кире кайтарыла торган салым күләме дә артачак. Хәзер максималь компенсация 260 мең сум булса, киләчәктә ул 780 мең сумга кадәр җитәргә мөмкин.

Канун инициаторы — Дәүләт Думасының хезмәт, социаль сәясәт һәм ветераннар эшләре комитеты рәисе Ярослав Нилов сүзләренчә, салым тотып калу лимиты 2014 елдан бирле үзгәртелмәгән. Шул вакыттан бирле торак бәяләре берничә тапкырга арткан, шуңа күрә хәзерге лимит күп гаиләләр өчен актуальлеген югалткан.

Аның мәгълүматларына караганда, 2014 елда беренчел базарда квадрат метр бәясе 60–70 мең сум тирәсе булган, ә 2025 елда ул 186–202 мең сумга кадәр җиткән. Бәяләр аеруча 2020 елдан соң, ташламалы ипотека программалары кертелгәч, тиз үсә башлаган.

Хәзерге кагыйдәләр буенча, фатир сатып алган кеше НДФЛ буенча салым базасын 2 млн сумга киметә ала. 13 процент ставка белән бу 260 мең сумга кадәр акчаны кире кайтару мөмкинлеге бирә.

Закон проекты авторлары яңа лимитны 2027 елның 1 гыйнварыннан гамәлгә кертергә тәкъдим итә. Алар фикеренчә, бу чара россиялеләргә торак сатып алганда финанс йөкләнешне киметергә ярдәм итәчәк.

Билгеле булганча, Татарстанда «Гаилә» илкүләм проекты гамәлгә ашырыла.