Студент гаиләләренә — аерым бүлмә: Дәүләт Думасы мөһим закон проектын хуплаган

Яңа нормалар нигезендә, никахлашкан яки балалы студентлар тулай торакта аерым торак алуга өстенлекле хокукка ия булачак. Бу хакта РИА Новости хәбәр итә. 

Закон проекты депутатлар төркеме тарафыннан тәкъдим ителгән. Алар арасында Дәүләт Думасының фән һәм югары белем бирү комитеты рәисе Сергей Кабышев та бар.

Проектта «студент гаиләсе» төшенчәсенә туры килгән (никахтагы яки балалы) студентларга:

* тулай торакта аерым бүлмә бирү,
* гаилә әгъзалары белән бергә яшәү мөмкинлеге тудыру карала.

Шулай ук югары уку йортларына гаиләләр өчен каралган аерым торак урыннары саны турында мәгълүматны ачык һәм аңлаешлы итеп бастыру бурычы йөкләнәчәк. Авторлар фикеренчә, бу абитуриентлар өчен дә мөһим фактор булачак.

Дәүләт Думасы Рәисе Вячеслав Володин билгеләп үткәнчә, күпләр өчен уку чорында гаилә коруны тоткарлаучы төп сәбәп — торак мәсьәләсе.

Конкуренцияне яклау комитеты рәисенең беренче урынбасары Игорь Игошин сүзләренчә, әлеге үзгәрешләр яшь гаиләләргә ярдәм итүгә юнәлдерелгән.

— Күп яшьләр уку вакытында гаилә корырга яки бала табарга нәкъ менә торак булмау сәбәпле батырчылык итми, — дип ассызыклаган ул.

Закон проекты демографик сәясәт кысаларында гаиләләргә ярдәм чараларын киңәйтүгә юнәлдерелгән. Парламентарийлар белдергәнчә, бу юнәлештә эш алга таба да дәвам итәчәк.